នាង ប្រាក់សុគន្ធ, អូនគ្មានសិទ្ធទៅចោលបងទេ, Cambodian idol 2016, Live Show...

Read More

ឯកា?

ភាពឯកា គ្មានអ្វីគួរឱ្យខ្លាចនោះទេ តែវាបានធ្វើឱ្យយើងបានយល់កាន់តែច្បាស់ ពីជីវិតដែលត្រូវរស់នៅ ។ ភាពឯកា វាបានបង្រៀនឱ្យយើងកាន់តែរឹងមាំជាងមុន ភាពឯកា វាបានបង្រៀនឱ្យយើងកាន់តែ ស៊ាំនឹងជីវិតច្រើន បើអ្នកចេះវិភាគបែងចែក បើអ្នកជាម្ចាស់នៃភាពឯកា អ្នកនឹងដឹងថា ភាពឯកា ជាស្ពានដែលចម្លងយើងឱ្យទៅរកសេរីភាព តែបើអ្នកជាទាសករនៃភាពឯកា នោះថ្ងៃណាមួយភាពឯកា នឹងបញ្ជាឱ្យអ្នកស្លាប់ដោយគ្មានសល់តម្លៃ សម្រាប់ជីវិតដែលអ្នកខំរស់តាំងពីបាតជើងក្រហមមក ។ មានមនុស្សជាច្រើនដែលតែងតែព្យាយាមជ្រៀតចូលទៅក្នុងជីវិតអ្នកផ្សេង ព្យាយាមអូសទាញមនុស្សដទៃឱ្យមកនៅក្បែរខ្លួន តែអ្វីៗម្តេចនឹងអាចស្របទៅតាមចិត្តយើងគ្រប់គ្នាបានទៅ បើគេមិននៅក្បែរ អ្នកក៏គួរតែមើលថែខ្លួនឯង ហើយខំយកពេលដែលទៅយកចិត្តអ្នកដទៃ ដើម្បីបង្រៀនខ្លួនឯងឱ្យស្គាល់ច្បាស់ និងចេះរស់នៅជាមួយខ្លួនឯងបានហើយ ជីវិតនេះគ្មាននរណាអាចមកកំដរយើងបានគ្រប់ពេលឡើយ ដែលក្រៅពីយើងខ្លួនឯងជាអ្នកបង្រៀនខ្លួនឯង ឱ្យចេះបែងចែក និងរស់នៅបានដោយខ្លួនឯង ។ ជាការពិត ពេលខ្លះ ខ្ញុំគិតថាខ្លួនឯងក៏ល្ងង់ណាស់ដែរ ដែលមានអ្នកនៅក្បែរហើយ តែខ្ញុំបែរជាព្យាយាមដើរចេញពីពួកគេ ខ្ញុំតែងតែផ្តាច់ទំនាក់ទំនងជាមួយមនុស្សមួយចំនួន ក៏ព្រោះតែចង់រស់នៅជាមួយភាពរឹងមាំដោយខ្លួនឯង ។ ក៏ព្រោះតែខ្ញុំស្គាល់ភាពឯកា ខ្ញុំគឺជាម្ចាស់នៃភាពឯកា ទើបធ្វើឱ្យខ្ញុំកាន់តែចូលចិត្តភាពស្ងប់ស្ងាត់ ខ្ញុំត្រូវការសេរីភាពសម្រាប់ខ្លួនឯងបែបនេះ ខ្ញុំក៏ចង់បង្រៀនមនុស្សមួយចំនួនឱ្យយល់ពីការបាត់បង់ ឱ្យគេព្រមទទួលយកភាពឯកា ក្នុងការរស់នៅជាមួយខ្លួនឯង ។

Read More

ខ្ញុំដឹង ថាខ្ញុំមិនដូចពីមុន

កាលពីមុន ខ្ញុំគឺជាមនុស្សម្នាក់ ដែលធ្វើអ្វី តែងតែចង់ឲ្យអ្នកដទៃបានដឹង ចង់ឲ្យគេខ្វល់ ចង់ឲ្យគេឯងយល់ចិត្ត ចង់ឲ្យគេយកចិត្តទុកដាក់ជាមួយ ធ្វើអ្វីក៏ដោយ ចង់ឲ្យគេចាប់អារម្មណ៍ មិនថាពេលខ្ញុំសប្បាយ ជាពិសេស គឺពេលដែលខ្ញុំមានទុក្ខ មិនសប្បាយចិត្ត គិតមិនចេញ ក្នុងចិត្ត ពេញដោយបញ្ហារាប់ជំពូក ក៏តែងតែចង់ឲ្យគេលូកដៃដឹងឮ ឬមានអ្នកលួងលោម ផ្ដល់កម្លាំងចិត្ត​ ផ្ដល់ក្ដីសង្ឃឹម តែអ្វីៗមិនដូចចិត្តដែលខ្ញុំត្រូវការ វាមិនដូចការគិតរបស់ខ្ញុំ គ្រប់ពេលដែលខ្ញុំកាន់តែទាមទារ វាជាពេលដែលខ្ញុំកាន់តែខូចចិត្ត អន់ចិត្ត គិតច្រើនតែម្នាក់ឯង ខ្ញុំគិតវែងឆ្ងាយ ខ្ញុំខ្វល់ខ្វាយ ខ្ញុំក្ដៅក្រហាយ វាក៏ក្លាយទៅជាការសន្សំគំនុំទៅវិញ ។

ពេលដែលខ្ញុំចង់ឲ្យមនុស្សម្នាក់ជួយខ្ញុំ នៅក្បែរខ្ញុំ តែត្រូវគេបដិសេធម្ដងហើយម្ដងទៀត វាធ្វើឲ្យខ្ញុំកាន់តែឃ្លាតឆ្ងាយពីមនុស្សទាំងអស់ ខ្ញុំត្រូវរស់នៅក្នុងសភាពនៃមនុស្សឯកា ខ្ញុំក្លាយជាមនុស្សដែលមិនត្រូវការអ្នកណាមកលួង ឬនៅក្បែរ ព្រោះតែថា បើទោះជាខ្ញុំចង់ ក៏គ្មានអ្នកណាចង់ដែរ ដូចនេះហើយ គេនៅតែគេ ខ្ញុំនៅតែខ្ញុំ លែងសន្សំអារម្មណ៍ខឹង អន់ចិត្ត គិតច្រើនទៀតហើយ នាំឲ្យខ្លួនឯងកាន់តែស្មុកស្មាញទៅវិញទេ ។

ពេលវេលាកន្លង បញ្ហាដែលធ្លាប់ហែលឆ្លង បានសណ្ឋិតនៅក្នុងការចងចាំ ដាំជាប់ក្នុងចិត្ត មិនភ្លេចទេ ពេញមួយជីវិត ...

ខ្ញុំធ្លាប់ខឹងនឹងគេ តែគេមិនដឹង ខ្ញុំធ្លាប់អន់ចិត្តនឹងគេ តែគេមិនខ្វល់ ខ្ញុំធ្លាប់ចង់ឲ្យគេខ្វល់ តែបានត្រឹមតែទទួលនូវភាពព្រងើយកន្តើយ ម្ល៉ោះហើយ កុំឲ្យខ្លួនឯង កាន់តែយ៉ាប់យ៉ឺន ពិបាកជាងនេះ គឺមានតែរៀនរស់ រៀនក្រោកឈរ រៀនលួង រៀនថែខ្លួនឯង ដោយខ្លួនឯងទៅវាល្អជាង ការដែលព្យាយាមទៅទាមទារពីគេ ។

មានមនុស្សមួយចំនួន បាននិយាយថា ខ្ញុំប្រែប្រួល ខ្ញុំផ្លាស់ប្ដូរច្រើនណាស់ ខ្ញុំមិនប្រកែកទេ ព្រោះវាជាការពិត ខ្ញុំព្រមទទួលយក ព្រោះខ្ញុំក៏ដឹង ថាខ្លួនឯងមិនដូចមុន


វាជារឿងធម្មតាទេ ដែលមនុស្សម្នាក់ៗត្រូវតែរៀនកែប្រែ ផ្លាស់ប្ដូរខ្លួនឯង ...

Read More

មនុស្សដែលគេមើលរំលង មិនដែលស្កាល់ស្នេហាបានម្ដង បានត្រឹមលួចស្រលាញ់គេ

ឈានដល់អាយុប៉ុណ្ណេះហើយ បើប្រាប់ចាស់ៗថា ខ្ញុំគ្មានសង្សារ ខ្ញុំគ្មានស្នេហា មិនចេះស្រលាញ់អ្នកណាផ្តេសផ្តាស់ បេះដូងនេះនៅឃ្លុំបេជិតយ៉ាងស្អាត មិនធ្លាប់ប្រឡាក់តំណក់ឈាមនៃក្តីស្រលាញ់រវាងបុគ្គលពីរនាក់ ជាក់ណាស់ថា ចាស់ៗលោកនឹងសរសើរ ថាខ្ញុំនេះជាក្មេងល្អ និងត្រឹមត្រូវ តែបើនិយាយប្រាប់ក្មេងៗសម័យឥឡូវ ប្រាកដណាស់ថាច្បាស់ជាត្រូវខ្មាសក្មេងៗ ព្រោះថាមនុស្សឈានចូលដល់វ័យនេះ គឺត្រូវតែមានសង្សារហើយមែនទេ? ក៏មានទាំងក្មេងៗខ្លះ អាយុទាំងប្អូនខ្ញុំផង ថាហើយគឺមានសង្សាររាប់ភ្លេច ចុះរឿងអីខ្ញុំចេះដើរមុនពួកគេបែរជាគ្មានសង្សារ គ្មានស្នេហា ពួកគេនឹងថាខ្ញុំនេះអន់ណាស់ គ្មានសម្រស់ គ្មានមន្តស្នេហ៍ ទើបគគ្មានអ្នកស្រលាញ់ ក្មេងពេបជ្រាយ មាក់ងាយថាខ្ញុំនេះស្រែ ដើរមិនទាន់សម័យនៃសង្សារបួនដប់ម្ភៃនាក់ ។ 

 និយាយទៅក៏អស់សំណើចនឹងខ្លួនឯងណាស់ដែរ ដូចចម្រៀង លោកឈន សុវណ្ណរាជច្រៀងអ៊ីចឹងគឺបទ " មនុស្សដែលគេមើលរំលង " " អាយុប៉ុណ្ណេះ មិនទាន់ស្គាល់ស្នេហាដំបូង បានត្រឹមលួចស្រលាញ់គេ ... មានស្នេហ៍ស្មោះឱ្យគេ គេមិនត្រូវការ អាចប្រាប់អ្នកណា បើគ្មានអ្នកនៅក្បែរ ..." នេះហើយជាអត្ថន័យនៃបទ " មនុស្សដែលគេមើលរំលង " និយាយទៅក៏ត្រូវម្យ៉ាងដែរទៅនឹងបទនេះ ព្រោះរាល់ថ្ងៃ ក៏មិនខុសអីពីមនុស្សដែលគេមើលរំលង ។ 

និយាយលាក់បាំងអី ឥឡូវនេះកំពុងតែមើលមនុស្សម្នាក់ ហើយក៏បានលាក់គេទុកក្នុងចិត្ត តែដឹងគេមើលខ្ញុំវិញឬក៏អត់នោះទេ ហើយខ្ញុំក៏មិនប្រាកដចិត្តឡើយថា​ការដែលលាក់មនុស្សម្នាក់នោះទុកក្នុងចិត្តបែបនេះគេហៅថាជាស្នេហាឬក៏ជាអ្វី ? បើមនុស្សមិនធ្លាប់មើលអ្នកណា មិនទាំងស្គាល់ស្នេហាយ៉ាងម៉េចផង តែបើនិយាយដល់រឿងស្នេហា សង្សារអីនឹងគឺមិនធ្លាប់មានពិតមែន តែបើនិយាយពីខ្លឹមសារវិញ គឺថាដឹងខ្ទេច ចង់និយាយថា គឺអ្នកឯកទេសប្រឹក្សារឿងស្នហារបស់គេ បើបានអ្នកណាមកនិយាយសួរនាំឲ្យជួយសោះស្រាយនឹង គឺវិភាគបែកខ្ទិះតែឯង ទ្រឹស្តីស្នេហាពេញខ្លួន មិនអួតទេ ស្នេហាចេះស្នេហាចុះ មានទៅខុសអី តែមិនដឹងថាទ្រឹស្តីនោះត្រូវឬក៏អត់មិនដឹង ហើយក៏មិនដឹងទៀតថាអ្នកមកពិភាក្សាជាមួយខ្ញុំនឹង គាត់ស្តាប់ខ្ញុំបកស្រាយពីន័យស្នេហាយល់ឬក៏អត់ គិតៗក៏ម្យ៉ាងដែរ គ្មានទេស្នេហា គ្មានទេសង្សារ តែកុំឲ្យអ្នកណានិយាយដល់រឿងនេះ គិតវិភាគបែកម៉ាំហ្មង បកស្រាយ ខ្លាំងជាងអ្នកគេមានទៅទៀត នេះហើយដែលគេថាមិនខុសមែនគឺ Single អាជីព

Read More

យុវវ័យ និង ក្ដីស្រលាញ់

តាមពិតទៅ មិនមែនថាមិនធ្លាប់ស្រលាញ់នរណាម្នាក់នោះទេ ព្រោះមនុស្សធំហើយ ឈានដល់វ័យនេះ គឺគេហៅថាជាយុវវ័យ ក៏មិនមែនមានន័យថាខ្ញុំនេះខុសឆ្គង ឬសាវានោះដែរ ព្រោះតែខ្ញុំធ្លាប់បានស្រលាញ់មនុស្សច្រើនមករាប់មិនអស់ គឺគ្រាន់តែស្រលាញ់គេ គ្រាន់តែចាប់អារម្មណ៍ ហើយក៏ពេញចិត្តគេ ពេលដែលបាននៅជិត ស្និតស្នាល និយាយលេង ឬក៏ទាក់ទងរាប់អានគ្នាជាមិត្ត តែក៏ធ្លាប់មានកូនចិត្តមួយគឺកូនចិត្តស្រលាញ់ ។ ហើយក្នុងពេលដែលស្រលាញ់នោះ ក៏មិនមែនមានន័យថាខ្ញុំស្រលាញ់តែម្នាក់នោះដែរ ព្រោះតែខ្ញុំធ្លាប់រាប់អានមនុស្សច្រើន ទើបមានពេលខ្លះក៏ស្រលាញ់គេ ដល់ទៅ៥ ៦នាក់ក្នុងពេលតែមួយក៏មានដែរ តែអ្នកនោះខ្ញុំក៏ជម្រុះចោលម្តងមួយៗ ទីបំផុតក៏អស់ទៅ ស្របពេលនឹងបានស្គាល់អ្នកថ្មី ក៏ចាប់ផ្តើមមានចិត្តស្រលាញ់អ្នកថ្មីទៀត មានពេលខ្លះក៏ស្រលាញ់ទាំងអ្នកមានម្ចាស់ក៏មានដែរ និយាយទៅគឺស្រលាញ់ហើយក៏ឈប់ ឈប់ហើយក៏ស្រលាញ់ គ្មានអ្វីទៅពិបាក ហើយខ្ញុំក៏ជឿថាវាមិនបានខុសឆ្គងអ្វីទៅលើអ្នកណាម្នាក់ ឬបុគ្គលដែលខ្ញុំស្រលាញ់ ក៏មិនអាចហៅថាខ្ញុំនេះសាវាដែរ ព្រោះតែខ្ញុំស្រលាញ់គេតែម្ខាង ក៏មិនបានទៅបំបែកបំបាក់អ្នកណាឡើយ គឺស្រលាញ់គេតែម្នាក់ឯង ហើយក៏ឈប់ស្រលាញ់គេដោយខ្លួនឯង ។ ខ្ញុំអាចស្រលាញ់មនុស្សប៉ុន្មាននាក់ក្នុងពេលតែមួយក៏បាន ព្រោះថា ក្នុងកំឡុងពេលនេះ ខ្ញុំមិនមែនជាកម្មសិទ្ធរបស់អ្នកណា ព្រោះខ្ញុំមិនទាន់បានច្បាស់ថាអ្នកណាដែលខ្ញុំនឹងជ្រើសរើស ព្រោះមនុស្សដែលខ្ញុំស្រលាញ់ គឺសុទ្ធតែមិនបានស្រលាញ់ខ្ញុំវិញ ហើយក៏អ្នកខ្លះក៏មិនបានទាំងដឹងថាខ្ញុំស្រលាញ់គេដែរ ហើយក៏មិនមានអ្នកណាអាចបញ្ជាក់ប្រាប់ខ្ញុំថាគេស្រលាញ់ខ្ញុំ ហើយខ្ញុំក៏ស្រលាញ់គេ សរុបជារួមទៅគឺខ្ញុំក៏នៅតែជាខ្ញុំ ពុំមានម្ចាស់ ក៏មិនមានមនុស្សផ្ទាល់ខ្លួននៅឡើយ ហ្ចឹងហើយក៏ចេះតែបណ្តោយឱ្យចិត្តនេះ ទៅស្រលាញ់អ្នកនេះផង ស្រលាញ់អ្នកនោះផង ទៅតាមអារម្មណ៍មួយពេល ។ ក៏ប៉ុន្តែ បើនិយាយដល់រឿងថាផ្ទាល់ខ្លួន គឺកម្មសិទ្ធផ្ទាល់ខ្លួន ប្រសិនបើមាននរណាម្នាក់ ដែលខ្ញុំបានដាក់ចិត្តស្រលាញ់ ហើយទទួលបានការស្រលាញ់ និង ជឿជាក់ពីគេមកលើរូបខ្ញុំវិញ នោះខ្ញុំក៏នឹងបញ្ឈប់រាល់ក្តីស្រលាញ់ទៅលើមនុស្សផងទាំងពួង គឺមានន័យថាបិទទ្វារបេះដូង ចាក់សោរនៃក្តីស្រលាញ់ត្រឹមមនុស្សម្នាក់នោះ ។ ជាការពិត ថាបើមានអ្នកណា ព្រមរួមដំណើរទៅជាមួយខ្ញុំរហូតទៅ មិនថាមានរឿងអ្វីកើតឡើង នោះខ្ញុំក៏នឹងធ្វើឱ្យនាងក្លាយជានារីដែលមានសំណាង ទទួលបានក្តីស្រលាញ់ពេញលេញ គ្រប់គ្រាន់ មានសុភមង្គលក្នុងជីវិត ជារៀងរហូត ហើយខ្ញុំក៏នឹងធ្វើអ្វីៗដើម្បីតែក្តីសុខរបស់ជីវិតគូនៃយើង ។ ដឹងថាគ្រាន់តែនិយាយគឺស្រួល ធ្វើវាពិបាក តែគ្រប់យ៉ាងគឺស្ថិតនៅលើការតាំងចិត្ត ដ្បិតអីមនុស្សម្នាក់នេះ មានចិត្តស្រវេស្រវាស្រលាញ់អ្នកណាមិនពិតប្រាកដក្នុងពេលនេះព្រោះតែគេមិនមានអ្នកចងចិត្តទុកច្បាស់លាស់ តែតទៅថ្ងៃមុខ ក៏ជឿថានឹងមិនមែនបែបនេះទេ ព្រោះម្នាក់នេះគឺពិតជាត្រូវការគ្រួសារមួយដែលល្អប្រសើរ រួមដំណើរជីវិតជាមួយគ្នាលុះអស់សង្ខារ ។ គួរបញ្ជាក់ថា ខ្ញុំជាមនុស្សដែលមានក្តីស្រលាញ់ពិតប្រាកដ តែមិនធ្លាប់មានការឈឺចាប់ ខកចិត្តក្នុងរឿងស្នេហា ក៏មិនធ្លាប់មាននរណាមកចងចិត្តទុក ដូច្នេះ ក៏អាចជឿជាក់បានថា អ្នកដែលចូលមកក្នុងជីវិតខ្ញុំនឹងក្លាយជាមនុស្សស្រីចុងក្រោយរហូតទៅ គ្រប់យ៉ាងដែលខ្ញុំបាននិយាយ មិនមែនជាការអះអាង ក៏មិនមែនជាសន្យា តែជាការពិតនៃដួងចិត្តមនុស្សម្នាក់នេះ ហើយក៏មិនចង់ឱ្យនារីណាម្នាក់ ចូលខ្លួនមកសាកល្បងចិត្តខ្ញុំ តែបើនាងអាចកំណត់ចិត្តខ្លួនឯងបានថាជាមនុស្សស្មោះត្រង់ មានជំហរក្នុងការសាងគ្រួសារមួយដ៏ប្រពៃ នោះនាងក៏ត្រូវតែហ៊ានលះបង់ និងចូលខ្លួនមកក្នុងជីវិតខ្ញុំដោយក្តីជឿជាក់ និងទុកចិត្តលើខ្ញុំ កុំស្ទាក់ស្ទើរ ព្រោះខ្ញុំនិយាយហើយក៏ធ្វើឱ្យបាន បើហ៊ានស៊ី ត្រូវហ៊ានសងដូចគ្នា ។

នៅក្នុងលោកយើងនេះ មានមនុស្សច្រើនណាស់រស់នៅ ហើយក៏ជាមនុស្សសម្រាប់យើងស្រលាញ់ តែប្រសិនបើថ្ងៃណាមួយ ក្តីស្រលាញ់នៃបុគ្គលទាំងពីរបានមានឲ្យគ្នាទៅវិញទៅមកហើយនោះ ចាំបាច់អីដែលត្រូវទៅស្រវេសវា ស្រលាញ់អ្នកណាផ្សេងជាការលេងសើច បញ្ចើចឲ្យជីវិតគូធ្វើអី ក៏គួរតែកាន់ដៃគ្នា ស្រលាញ់គ្នា ចិត្តមួយថ្លើមមួយ ចេះជួយទុក្ខធុរ:គ្នាទៅវិញទៅមក នោះយើងនឹងបានយល់ថាអ្វីទៅជាសុភមង្គលនៃជីវិតគូ ខ្ញុំគ្រាន់តែគិតថា ខ្ញុំនឹងស្មោះត្រង់មើលថែមនុស្សម្នាក់ដែលព្រមចូលមកក្នុងជីវិតខ្ញុំ ហើយអនុញ្ញាតិឲ្យខ្ញុំបានរួមដំណើរជីវិតជាមួយគេ ដើម្បីមើលថែនាង ផ្តល់ភាពកក់ក្តៅឲ្យនាង ធ្វើគ្រប់យ៉ាងដើម្បីឲ្យនាងបានក្លាយជានារីដេលមានសំណាងនៅក្នុងលោកនេះ ក្នុងចំណោមនារីដែលតិចតួចបំផុតដែលកំពុងតែមានក្តីសុខ និងសុភមង្គលក្នុងជីវិតជាមនុស្សស្រី នោះក៏ជាការទទួលខុសត្រូវមួយសម្រាប់ជីវិតជាមនុស្សប្រុសប្រពៃម្នាក់ ហើយខ្ញុំក៏ជឿថា ត្រឹមធ្វើជាមនុស្សប្រុសល្អ ស្មោះសរនឹងនារីម្នាក់គឺមិនពិបាកទេ មែនទេ? ស្រលាញ់គេ ត្រឹមមិនក្បត់គេ ស្រលាញ់គេ ត្រឹមរស់នៅផ្តល់ភាពកក់ក្តៅឲ្យគេ ស្រលាញ់គេ ត្រឹមមើលថែចិត្ត កាយ បេះដូងគេ ស្រលាញ់គេ ត្រឹមធ្វើជាបុរសដ៏ល្អសម្រាប់គេម្នាក់ វាមិនពិបាកឡើយ សម្រាប់មនុស្សម្នាក់ដែលមាននាមថាជាកូនប្រុសដើមទ្រូងប្រាំហត្ថ ខ្ញុំជឿថាបុរសគ្រប់រូបនឹងធ្វើបាន បើគេគិតយល់ និងឲ្យតម្លៃក្នុងភាពជាបុរសរបស់គេ លើកលែងតែគេ មិនគិតថាខ្លួនគេជាមនុស្សប្រុស លើកលែងតែគេមិនឲ្យតម្លៃខ្លួនឯងនិងក្តីសុខ សុមង្គលក្នុងជីវិត គឺលើកលែងតែគេមិនបានតាំងចិត្តថានឹងមានគ្រួសារដ៏ល្អមួយ ៕

Read More

រៀនផ្លាស់ប្ដូរខ្លួនឯងខ្លះ បើកឱកាសទទួលយកនូវអ្វីដែលថ្មី ហើយបោះបង់នូវអ្វីដែលមិនគួររក្សាទុក

ពេលវេលាចេះតែផ្លាស់ប្តូរទៅ មនុស្សក៏ត្រូវតែប្រែប្រួលទៅតាមនោះដែរ ផ្លាស់ប្តូរទម្លាប់ខ្លះ ក៏មិនប្រាកដថាចិត្តនេះមិនដូចមុន ខ្ញុំគ្រាន់តែចង់រៀនស្រលាញ់នូវអ្វីដែលខ្លួនឯងមិនចូលចិត្តកាលពីមុន ហើយចង់បង្រៀនខ្លួនឯងឱ្យបញ្ឈប់នូវក្តីស្រលាញ់ ដែលធ្លាប់មានលើអ្វីមួយចំនួនកាលពីពេលកន្លងមកតែប៉ុណ្ណោះ ... មានរឿងខ្លះគួរតែបោះបង់ចោល ក៏មានរឿងខ្លះគួរតែទទួលយកមកបន្ថែម មានទម្លាប់ខ្លះគួរតែបោះបង់ ក៏មានទម្លាប់ខ្លះគួរតែសាកល្បងធ្វើ ... មានមនុស្សខ្លះគួរតែបំភ្លេច ក៏ត្រូវតែមាបមនុស្សថ្មីខ្លះ ដែលត្រូវតែទទួល សាកល្បងស្គាល់គ្នា ... ខ្ញុំធ្លាប់គិតថា ខ្ញុំមិនអាចបោះបង់ចំណង់ចំណូលចិត្តកាលពីមុន ក៏មិនផ្លាស់ប្តូរអារម្មណ៍ ឬការស្រលាញ់អ្វីដែលខ្លួនមិនធ្លាប់គិត ... គឺមានន័យថា មិនចង់ផ្លាស់ប្តូរខ្លួនឯង ឱ្យក្លាយជាមនុស្សថ្មី ប៉ុន្តែ គិតៗទៅ មានមនុស្សច្រើនណាស់ រួមទាំងមនុស្សដែលស្និតនឹងខ្ញុំបំផុត ពួកគេសុទ្ធតែផ្លាស់ប្តូរខ្លួនឯងទៅតាមពេលវេលាដែលកំពុងតែប្រែប្រួលពីមួយថ្ងៃទៅមួយថ្ងៃ ... ហ្ចឹងហើយ ចុះខ្ញុំត្រូវនៅតែមនុស្សគំនិតចាស់កំរិលដល់ណាទៀត ក៏គួរតែរៀនផ្លាស់ប្តូរខ្លួនខ្លះហើយ ខ្ញុំមិនមែនផ្លាស់ប្តូរតាមគេ តែខ្ញុំគ្រាន់តែចង់ទទួលយកអ្វីដែលថ្មីដោយការសាកល្បង ហើយក៏ចង់បន្សាបអ្វីដែលមានពីមុនមួយចំនួនចោលខ្លះតែប៉ុណ្ណោះ ... ហើយក៏សុំទោសដល់អតិតកាល សូមស្វាគមន៍អនាគត ដោយចាប់ផ្តើមពីខ្ញុំក្នុងបច្ចុប្បន្ននេះ ...

Read More

តើដល់វ័យណា ដែលអ្នកយល់ថា អ្នកសក្ដិសមនឹងរៀបការ មានគ្រួសារ ?

តើអ្នកចង់រៀបការ នៅក្នុងវ័យណា អាយុប៉ុន្មាន ?

ការរៀបការ គ្រាន់តែនិយាយ ចុះមានអ្វីទៅពិបាក តែការរៀបការ មិនមែនរៀបការតែមួយថ្ងៃ ហើយបានកាន់ដៃគ្នា ជារឿងចប់នោះទេ ... ពេលវេលាមួយជីវិត ដែលជាពេលវេលាពិត សម្រាប់មនុស្សពីរនាក់ ត្រូវប្រើរួមគ្នា ។ 

អ្នកខ្លះ ក្មេងពេក ខ្លាចមិនគង់យូរ អ្នកខ្លះចាស់ពេក ខ្លាចគ្មានគូ គ្មានអ្នកស្រលាញ់ សរុបមកវិញ រឿងអាយុ រឿងវ័យ ជារឿងមួយផ្នែក ចែកឱ្យដាច់ សម្រេចឱ្យត្រូវ មិនថាអ្នកស្ថិតនៅក្នុងវ័យណា អាយុប៉ុន្មាន បានរៀបការ មានគ្រួសារ វាមិនសំខាន់ឡើយ តែសូមឱ្យអ្នក ជឿជាក់ ប្រាកដចិត្ត ថាអ្នកពិតជា ចេះគិត មានគំនិត មានចិត្ត រឹងប៉ឹង នឹងន ដឹងល្អអាក្រក់ ចេះរៀបចំ ចេះប្រឈមមុខ នឹងបញ្ហា ដែលនឹងត្រូវកើតមាននៅក្នុងគ្រួសារ អ្នកអាចមានភាពរឹងមាំគ្រប់គ្រាន់ ក្នុងការដោះស្រាយ នូវរឿងរ៉ាវដែលអ្នកជួប អ្នកអាចទទួលយក គ្រប់យ៉ាងពីដៃគូរបស់ខ្លួន មិនថារឿងល្អ ឬក៏ទម្លាប់អាក្រក់របស់គេ អ្នកអាចមានពេលវេលា សម្រាប់ឱ្យគ្នាទៅវិញទៅមក អ្នកមានចិត្តត្រជាក់ មិនឆេវឆាវ ចេះរម្ងាប់អារម្មណ៍កុំក្ដៅក្រហាយ ចេះលះបង់ភាពសប្បាយផ្ទាល់ខ្លួន ដើម្បីក្ដីសុខ និងភាពរីករាយរួមគ្នា ...។

អ្នកខ្លះ រៀបការនៅអាយុតិច តែគេយល់ពីតិចនិចនៃការរស់នៅជាមួយគ្នា គេអាចរក្សាចំណងនៃជីវិតគូរបស់គេ បានយូរអង្វែង ...  ចំណែកអ្នកខ្លះ រៀបការនៅអាយុច្រើន វ័យចំណាស់ក៏ពិតមែន តែមិនចេះក្រែង មិនចេះគិតវែងឆ្ងាយ ជីវិតគូជួបតែតែភាពរកាំរកូស ក្ដៅក្រហាយ មិនបានយូរ ក៏បាក់បែកចែកផ្លូវគ្នា ... ។

នេះហើយបញ្ជាក់ថា បើទោះជាអ្នករៀបការ មានគូនៅវ័យណាមួយក៏ដោយ តែបើអ្នកមិនមានភាពរឹងប៉ឹង នឹងន ឬជំហររឹងមាំ គ្មានភាពជាអ្នកដឹកនាំ មិនចេះទ្រាំទ្រ ឬក៏គ្មានចិត្ត គ្មានគំនិត គិតគូរបែងចែក វែកញែក ថ្លឹងថ្លែង យល់តែពីខ្លួនឯង មិនចេះយល់ដល់ដៃគូរបស់ខ្លួន នោះហើយ ជីវិតគ្រួសារក៏មិនមាំមួនដែរ គេថា ចាស់តែវ័យ តែគំនិតនៅខ្ចី ដៃមិនចេះក្ដោបក្ដាប់ ឆាប់បែកបាក់ គ្មានអ្វីពិបាកយល់នោះឡើយ ហើយក៏មិនចម្លែកដែរ បើខ្លាំងទៅខ្លាំងមក ជម្រកក៏មិនកក់ក្ដៅ រស់នៅមិនចុះសម្រុង ក្នុងគ្រួសារ ប្រេះឆា ជារឿងធម្មតារបស់មនុស្សខ្វះភាពអត់ធ្មត់ ចែះតែដុត មិនចេះពន្លត់ ... ៕

Read More

ប្រសិនបើអ្នកត្រូវគេបោះបង់ ហើយខូចចិត្ត
ចូរអ្នកចងចាំអោយច្បាស់ថា អ្នកមិនមែនជាមនុស្សតែម្នាក់ដែលខូចចិត្ត
ហើយគ្មានអ្នកណាម្នាក់ដែលកើតមកហើយមិនខូចចិត្តនោះទេ គ្រប់គ្នាត្រូវតែឆ្លងកាត់រឿងរ៉ាវទាំងអស់នេះដូចគ្នាក្នុងមួយជីវិត

ភាពឯកោ អាចធ្វើអោយអ្នកមានអារម្មណ៍កណ្តោចកណ្តែង តែវាមិនបានធ្វើអោយអ្នកឈឺចាប់ទេ មានតែយើងខ្លួនឯងដែលព្យាយាមទាញការឈឺចាប់មកដោយខ្លួនឯង ចូរស្រលាញ់ត្រឹមព្រំដែនដែលអាចស្រលាញ់ ព្រោះមនុស្សខ្លះយើងមានឱកាសនិងពេលបានត្រឹមតែស្រលាញ់មួយរយៈប៉ុណ្ណោះ មិនមែនមានន័យថាគេកើតមកជារបស់យើង សំរាប់តែយើងម្នាក់ទេ

សាកគិតមើល ពីមុនគ្មានគេយើងក៏អាចរស់នៅបានយ៉ាងសប្បាយមិនខ្វល់ខ្វាយ មិនកើតទុក្ខ
ត្រឹមពេលនេះមិនមានគេទៅគិតអីច្រើនម្ល៉េះ យើងមិនអាចមើលដឹងថ្ងៃស្អែក តែចូរព្យាយាមធ្វើថ្ងៃនេះអោយល្អសំរាប់ថ្ងៃស្អែកថ្មី កុំនៅត្រាំខ្លួនជាមួយអតីតកាល
ឈប់គិតថាគេជាមនុស្សដែលល្អបំផុតសំរាប់អ្នក ព្រោះបើគេល្អសំរាប់អ្នកហេតុអ្វីអ្នកឈឺចាប់ដោយសារគេ
ព្យាយាមបើកចិត្តគិតអោយធំ ដូចពាក្យថា នៅលើមេឃមានមេឃ
នៅមានមនុស្សល្អៗជាច្រើនសំរាប់អ្នក ត្រឹមតែអ្នកឈានជើងដើរបន្តទៀត កុំឈប់ធ្មឹងកើតទុក្ខមួយកន្លែង ដើម្បីរកវិធីដើរត្រឡប់ថយក្រោយទៅរកអតីតដែលធ្វើអោយអ្នកឈឺចាប់នោះ
ថ្ងៃនេះវាអាចជាថ្ងៃដែលមានព្យុះមានភ្លៀង តែយើងត្រូវចាំថាក្រោយភ្លៀងមេឃស្រឡះ ដូចនេះច្បាស់ណាស់ ត្រូវតែមានថ្ងៃមួយដែលមេឃនឹងស្រស់ថ្លាជាថ្មីជាក់មិនខាន ។


ប្រភព : ព្រះ ចន្ទ្រ

Read More

ល្អឬអាក្រក់គឺស្ថិតលើបុគ្គល

ល្អ ឬ អាក្រក់ គឺស្ថិតនៅលើបុគ្គល មិនមែនស្ថិតនៅលើ ពូជពង្ស វហ្សត្រកូល ខ្សែស្រឡាយ ញាតិសន្តាន នោះឡើយ ។ បុគ្គលម្នាក់ឯងល្អឬអាក្រក់ គឺស្ថិតនៅលើចិត្តគំនិត ចរិតឫកពារ មាយាទ សម្តីសំដៅ និងការប្រព្រឹត្តិរបស់បុគ្គលនោះ រីឯ ពូជពង្ស វង្សត្រកូល គ្រួសារ ខ្សែស្រឡាយ ញាតិកា ផៅសន្តាន គឺគ្រាន់តែជារឿងផ្គួបផ្សំ បំពេញពីក្រោយតែប៉ុណ្ណោះ ។ តួយ៉ាងដូចជនខ្លះ ពូជពង្ស សាវតារ ប្រវត្តិគ្រួសារ មេបា មិនល្អ តែបែរជាកូនៗតជំនាន់ក្រោយ បានល្អ ខ្ពង់ខ្ពស់ មានកិត្តិយសក្នុងសង្គម អ្នកផងស្រលាញ់ អាណិតចូលចិត្ត គេឯងកោតក្រែង សរសើរ រាប់រក ... ចំណែកបុគ្គលខ្លះវិញ សាវតារ ដូនតា គ្រួសារ ឪពុកម្តាយ ខ្សែស្រឡាយ ពូជពង្ស ខ្ពង់ខ្ពស់ មានកិត្តិយសល្អប្រពៃ មានអ្វីៗគ្រប់យ៉ាង តែបែរជាកូនចៅជំនាន់ក្រោយ មាយាទមិនបាន អន់ចរិត ពាលា អាវាសែ ប៉ោឡែ គ្មានកំណើត ... ក៏មិនខុសពី ផ្កាឈូក ដែលលូតលាស់ពីភក់បាតបឹង អ្នកណាទៅដឹងថា ផ្កាឈូកមានតម្លៃ ថ្លៃណា អ្នកផងប្រុសស្រី យកផ្កាទៅបូជាថ្វាយព្រះ លើដៃសំពះបួងសួង ប្រណមជាប់ហត្ថាទាំងសង ប៉ងប្រាថ្នាដោយផ្កាដែលដុះចេញពីភក់បាតបឹងនោះ ដូច្នេះ មនុស្សក៏ដូចគ្នា កុំសម្លឹងទៅអតីតកាល កុំពិចារណាទៅលើ ប្រវត្តិសាវតារ ក្រុមគ្រួសាររបស់គេ ត្រឹមតែសម្លឹងមើលទង្វើ ការប្រព្រឹត្តិ ចរិត ឫក្សពារមាយាទ សម្តីសំដៅ បច្ចុប្បន្នភាពរបស់គេ ក៏យើងអាចដឹងបានហើយថា បុគ្គលនោះជាមនុស្សបែបណា ល្អឬអាក្រក់ គឺបុគ្គលជាអ្នកស្តែងឱ្យឃើញដោយខ្លួនឯងតែប៉ុណ្ណោះ ចំពោះរឿង គ្រួសារ ផៅសន្តាន គ្រាន់តែជាការ បញ្ចើចបញ្ចើ សរសើរ បន្ទុកបន្តាក់ ជាការស្តែងឱ្យឃើញ ទាញមកប្រទាក់ក្រឡាគ្នាមួយគ្រាទេ ... ៕

Read More

ចេះរក ចេះចាយ ចេះចំណាយ ចាយមានរបៀប

អ្នកណាៗ ក៏ចេះចាយដែរលុយ ឱ្យតែមាន ចាយខ្ទេចគ្មានសល់ តែអ្នកដែលចេញធ្វើការ រកស៊ីដោយខ្លួនឯង ទើបដឹងច្បាស់ពីរបៀបនៃការចាយវាយ ។

លុយមិនមែនអាចរកបានមកដោយងាយៗ ដូចកាលដែលយើង លាដៃសុំលុយប៉ាម៉ាក់ សុំបានៗ យ៉ាងច្រើន ត្រូវមាត់ គាត់ស្ដីឱ្យពីរបីម៉ាត់ក៏ស្ងាត់ទៅ ចុងក្រោយក៏នៅតែបានលុយយកមិនចាយ ដោយគ្មានចំណាយ កម្លាំងញើសឈាម ដើម្បីរកនោះឡើយ ។

កាលពីមុន លុយបានមកស្រួលៗ ចុះមានទៅពិបាកអី ដែលគ្រាន់តែចាយ ទិញនូវអ្វីដែលខ្លួនឯងចង់បាន ចំណាយទៅលើអ្វីដែល គ្រាន់តែជារបស់ឥតប្រយោជន៍ យកមកបំពេញនូវតម្រូវការនៃចិត្ត ដែលមិនបានគិតវែងឆ្ងាយនោះ ចាយដូចសេដ្ឋី លុយពេញដៃ ចាយដូចអ្នកមានមហាសាល តែមិនដែលគិតទេថា អ្នកដែលផ្ដល់លុយឱ្យយើងចាយ គាត់ចំណាយ កម្លាំងកាយ ចាយញើសចាយឈាមគាត់កម្រិតណា ទម្រាំតែបានលុយនេះមក តែគាត់ក៏បែរជាយកមកឱ្យយើង ជះលែង តាមរបៀបក្មេង មិនចេះគិតពិចារណាទៅវិញ ។

រហូតដល់ពេល ដែលខ្លួនឯងចាប់ផ្ដើម ចេញរកមកដោយខ្លួនឯង ទើបដឹងថា លុយមិនមែនស្រួលឡើយ ទម្រាំតែបានវាមក អ្នកខ្លះ ត្រូវក្រាបផងលូនផង ធ្វើមុខស្ដើង មុខក្រាស់ ក៏ពេលខ្លះ មិនទាន់ទាំងបាន កាន់លុយផាស់ៗដៃទេ ធ្វើការ រកស៊ីគ្មានពេលទំនេរ គ្មានពេលថែរក្សាសុខភាពខ្លួនឯងទៅទៀត ដល់ពេលអ៊ីចឹងបានដឹង បានយល់ ហើយក៏ចេះគិតលើការចំណាយចាយវាយ ។

មនុស្សម្នាក់ កែប្រែ ធ្លាប់តែចាយវាយខ្ជះខ្ជាយ ក៏បែរជាក្លាយទៅជាមនុស្សម្នាក់ ដែលចេះរិះចេះថាំ របស់ល្មមៗ ឬរបស់ណា ដែលគ្មានបានការ គ្មានប្រយោជន៍ ក៏មិនខ្ចីទៅទិញយកមកបង្ហិនលុយនោះទេ ។

លុយមានឱ្យចាយ តែត្រូវដឹង ពីរបៀបនៃការចាយ មិនមែនចាយឱ្យសប្បាយនោះទេ គឺត្រូវចាយឱ្យមានតម្លៃ ឱ្យសមនឹងការដែលយើងបានមកដោយលំបាក ។

ទិញរបស់ដែលគួរទិញ ចំណាយលើអ្វីដែលគួរចំណាយ ចាយឱ្យដឹងពីពេលវេលា កាលៈទេសៈ ពេលចាយត្រូវចាយ ពេលរិះត្រូវរិះ ពេលថាំ ត្រូវថា ជួនកាល ពេលដែលយើងមិនចំណាយទៅលើអ្វីមួយ ឬឱ្យមនុស្សមិនគួរឱ្យ មិនមែនយើងគម្រិះទេ មិនមែនយើងម៉ៅស្វិតទេ តែយើងមានពេល យើងចេះគិតល្អិតល្អន់ យើងមានហេតុផល យើងយល់ក្នុងការចាយ ។

មានពេលខ្លះ ក៏ព្រមទទួល ក៏មិនប្រកែកទេ បើគេថាយើងនេះគម្រិះ តែធ្វើយ៉ាងណា ក៏មិនចង់ឱ្យខ្លួនឯងពិបាកទៅថ្ងៃមុខ ក៏ព្រោះតែចាយមិនគិត ដ្បិតខ្លាចគេថាឱ្យខ្លួននេះ ម៉ៅស្វិត បើចាយមួយថ្ងៃ ដាច់យ៉ៃមួយខែ សួរថា វាឡូយត្រង់ណា វាអស្ចារ្យត្រង់ណា សួរថា សប្បាយទេ ហំហើយឬ ដែលបានសង្ហា ចាយតែមួយថ្ងៃនោះ ។

Read More

ខ្លួនទីពឹងខ្លួន

អ្នកដទៃអាចបានត្រឹមជាកម្លាំងចិត្តដល់យើងក្នុងការធ្វើដំណើរលើវិថីជីវិតតែប៉ុណ្ណោះ តែរឿងឆ្ពោះទៅមុខបានឬមិនបាន គឺអាស្រ័យនៅលើយើងខ្លួនឯង ថាអាចត្រួសត្រាយផ្លូវទៅបានដោយរបៀបណា បានឆ្ងាយប៉ុណ្ណា បានល្អប៉ុណ្ណា ... ។

ដំណើរដើរនៅក្នុងជីវិត កម្រិតឱ្យមាននូវ បញ្ហា ការតស៊ូ អំណត់អត់ធ្មត់ កំបាក វេទនា ឧបសគ្គជាច្រើនរាប់មិនអស់ បើយើងរឹងមាំគ្រប់គ្រាន់ មិនថាបញ្ហា ឧបសគ្គច្រើនប៉ុណ្ណាក៏យើងនៅតែជំនះទៅបាន ។

បញ្ហា ការលំបាក ឧបសគ្គច្រើនប៉ុណ្ណា អ្នកនឹងបានដឹងថា អ្នកអាចរឹងមាំបានច្រើនទ្វេដង ។

ភាពជោគជ័យលើវិថីជីវិត គឺពិតមិនងាយស្រួលឡើយ គ្មានការជោគជ័យណា ដែលថាមិនឆ្លងកាត់ការបរាជ័យនោះទេ ...

បើយើងចេះទទួលស្គាល់ការពិត បើកចិត្តបើកឱកាសឱ្យខ្លួនឯង កុំដាក់គំនាបគាបសង្កត់លើខ្លួនឯង យើងនឹងមើលឃើញតែចំនុចវិជ្ជមាន ក្នុងការធ្វើដំណើរ ដើរលើវិថីជីវិតដ៏វែងឆ្ងាយរបស់យើង ត្រូវតែមានក្តីសង្ឃឹម ត្រូវតែញញឹមឱ្យខ្លួនឯង ត្រូវតែចេះបើកឱកាសសម្រាប់ខ្លួនឯងជានិច្ច ... ៕

Read More

នេះហើយជាខ្ញុំ

ខ្ញុំមិនរំពឹងឲ្យនរណាម្នាក់មកលះបង់ដើម្បីខ្ញុំ មកអង្គុយនិយាយលួងលោមខ្ញុំ  មកនិយាយពាក្យផ្អែមល្អែមជាមួយខ្ញុំ មកអែបអបយកចិត្តទុកដាក់ ដោយគិតថាខ្ញុំមានចរិតដូចក្មេងទន់ខ្សោយ ឬ ក្មេងដែលនៅស្ទើរមិនទាន់ដឹងក្តីនោះទេ ។  ខ្ញុំស្គាល់ខ្លួនខ្ញុំច្បាស់ ហើយវារឹតតែច្បាស់ជាង អ្នកស្គាល់ខ្លួនរបស់អ្នកទៅទៀត ។ 

ពេលខ្លះខ្ញុំចូលចិត្តភាពសោះកក្រោះ ព្រោះវាស្ងប់ស្ងាត់ វានាំខ្ញុំឲ្យមានអារម្មណ៍នឹងន ។ ពេលខ្លះខ្ញុំ ចូលចិត្តនៅស្ងៀម ព្រោះការមិនតបត គឺជាដំណោះស្រាយ ជាការរៀនអត់ធ្មត់ ជាការរៀនបង្កើនទម្ងន់ផ្លូវចិត្ត ។

ខ្ញុំមិនចង់ចាកចេញពីភាពឯកោ ព្រោះភាពឯកោផ្តល់ឲ្យខ្ញុំនូវ សេរីភាពពេញទី ផ្តល់អាទិភាពខាងធ្វើសេចក្តីសម្រេចចិត្ត ហើយនាំឲ្យខ្ញុំដឹងអំពីធម្មជាតិនៃចរិតពិតខ្ញុំ ។

ខ្ញុំគឺជាមនុស្សមានអាថ៌កំបាំងច្រើនក្នុងផ្លូវចិត្ត ។ ខ្ញុំចូលចិត្ត មនុស្សដែលមាននិស្ស័យ ចង់ស្វែងយល់ ចង់ដឹង ជាជាង និយាយអ្វីមួយ ដើម្បីប្រាប់ទៅគេត្រង់ៗ ។

សរុបមកខ្ញុំជាមនុស្សដែលពិបាក ឲ្យអ្នកដទៃស្វែងយល់ឲ្យបានស៊ីជម្រៅ ។ តែយ៉ាងណាក៏ដោយ ខ្ញុំមានធាតុល្អ ច្រើនជាង ធាតុអាក្រក់នៅក្នុងខ្លួន ដ្បិតអីខ្ញុំជាមនុស្សស្វែងរកក្តីសុខ ជាជាងស្វែងរកទ្រព្យសម្បត្តិ ....។

ត្រូវចិត្ត ត្រូវអារម្មណ៍ ហ៉ឺ... :-(

រក្សាសិទ្ធិ : បងប្រុស ជា សុភារិទ្ធិ ល្វីសអង់ដ្រូ

Read More

#មនុស្សល្ងង់ឯងកំពុងគិតអី?

ពេលវេលា ចេះតែកន្លងផុតទៅ តែអារម្មណ៍សោកសៅ នៅដិតដាមជាប់ក្នុងចិត្តមិនលែង ខ្ញុំនៅតែគិត នៅតែនឹក ក៏នៅតែមិនអាល័យតែម្នាក់ឯង ...
ធ្មេចបើកៗ អស់រយៈពេល២ឆ្នាំហើយ ដែលគេចាកចេញពីផែនដីនេះ ទាំងមិនបានលា គ្រប់គ្នាអាចនឹងដឹង ថាម្នាក់នោះ ចាកចេញព្រោះតែអារម្មណ៍ឈឺចាប់ខ្លាំង គេមានវិប្បដិសារី តែប្រហែលគ្រប់គ្នាមិនច្បាស់ទេ ថាការពិតនោះជាអ្វី ? ដូចខ្ញុំ ឬក៏ប្រហែលជាមានតែខ្ញុំ ដែលនៅចងចាំគេ ទាំងដែលការពិត ខ្ញុំនិងគេម្នាក់នោះ មិនទាំងត្រូវជាអ្វីនឹងគ្នា ថាសូម្បីទំនាក់ទំនងក៏ពួកយើងគ្មានដែរ ខ្ញុំគ្រាន់តែជាអ្នកដទៃ ហើយបានស្គាល់គេក្នុងថ្ងៃ ដែលគេចាកចេញតែប៉ុណ្ណោះ ប៉ុន្តែ ខ្ញុំនៅតែមិនអស់ចិត្ត មិនអស់អាល័យ ថាហេតុអ្វី ក៏គេដាច់ចិត្តចាកចេញទៅ ខ្ញុំក៏នៅតែមានអារម្មណ៍ថា ម្នាក់នោះមិនទាន់ទៅណា ម្នាក់នោះ នៅរស់នៅឡើយ ប្រហែលជាខ្ញុំឆ្កួតហើយមែនទេ មែនហើយ តែខ្ញុំនិយាយអារម្មណ៍ពិត ខ្ញុំមាននិស្ស័យជាមួយគេ ទើបខ្ញុំនៅទន្ទេញឈ្មោះគេ ខ្ញុំនៅតែចងចាំទឹកមុខ ស្រងូតស្រងាត់របស់គេ តែនិស្ស័យខ្ញុំនិងគេ វាជានិស្ស័យកម្ម ដែលខ្ញុំត្រូងរង់ចាំតែម្នាក់ឯង ... ។

ខ្ញុំមានអារម្មណ៍ថា រឹតតែឯកា ឱ្យតែពេលណាដែលខ្ញុំនឹកដល់ម្នាក់នោះ ព្រោះតែអ្វី ?

#មនុស្សល្ងង់ឯងកំពុងគិតអី?

Read More

នៅពេលដែលខ្ញុំចាកចេញ សូមកុំសួរដេញដោលខ្ញុំថាមកពីហេតុអ្វី ?

នៅពេលដែលខ្ញុំចាកចេញពីអ្នក សូមកុំសួរខ្ញុំថាមកពីហេតុអ្វី ?

បើថ្ងៃណាមួយអ្នកមិនប្រយ័ត្នធ្វើឱ្យ បាត់បង់ខ្ញុំ ខ្ញុំនឹងមិនឱ្យអ្នករកខ្ញុំឃើញទេ ។ មិត្តភក្តិក៏ដោយ ស្នេហាក៏ដោយ ឱ្យតែអ្នកមិនស្មោះត្រង់នឹងខ្ញុំហើយ ហេតុអីខ្ញុំត្រូវធ្វើល្អដាក់អ្នកទៀតនោះ ? ទង្វើរបស់ខ្ញុំល្អឬអាក្រក់ គឺស្ថិតនៅលើអ្នកធ្វើបែបណាចំពោះខ្ញុំ ។

ពេលវេលាមួយវិនាទីកន្លងទៅយ៉ាងឆាប់​រហ័ស អាយុកាន់តែច្រើន មើលឃើញកាន់តែច្បាស់ យល់កាន់តែច្រើន ភាពរីករាយក៏កាន់តែមានតិចទៅដែរ ។ 

ពេលវេលាអាចកែប្រែអ្វីៗជាច្រើន ខ្ញុំធ្លាប់ល្ងង់ ធ្លាប់ឆ្កួត ធ្លាប់រឹងរុះ ធ្លាប់តស៊ូ ធ្លាប់ស្រលាញ់ រាប់អាន ធ្លាប់គោរព ទីបំផុតខ្ញុំនៅតែជាខ្ញុំដដែល ។ ខ្ញុំនៅតែជាអ្នកលួងលោម និងព្យាបាលរបួសដោយខ្លួនឯងដដែល ។ 

ខ្ញុំមិនល្អ តែនៅលើលោកនេះ មានរូបខ្ញុំតែមួយគ្មានពីរ អ្នកចង់ថែរក្សាក៏បាន មិនចង់ក៏ហី ប៉ុន្តែឱ្យតែថ្ងៃណាមួយដែលអ្នកបោះបង់ខ្ញុំចោលហើយ ខ្ញុំនឹងមិនឱ្យអ្នករកខ្ញុំឃើញទៀតទេ ។ 

ឥឡូវនេះខ្ញុំសុំតែធ្វើអ្វីៗ ចូលស្ទឹងតាមបត់ មើលតាមកាលៈទេសៈប៉ុណ្ណោះ ។ ហើយសូមកុំថាខ្ញុំមិនខ្វល់ បើខ្ញុំខ្វល់តើវាយ៉ាងម៉េច ? វានៅតែដដែល គ្រាន់តែថាមានរឿងខ្លះ ខ្ញុំគិតយល់ និងមើលធ្លុះនូវរឿងមួយចំនួន ហើយក៏បានបើកចិត្តទទួលយកការពិតដែរ ។ 

ម្យ៉ាងវិញទៀត មនុស្សយើងនេះ រឿងដែលមិនយល់ មានច្រើនពេកហើយ ពេលចង់ដឹងចង់យល់ច្រើនពេកទៅធ្វើឲ្យខ្លួនឯងកាន់តែរងរបួស ។ 

ខ្ញុំធ្លាប់ជាមនុស្សដែល ចូលចិត្តធ្វើអ្វីផ្តួចផ្តើមមុនគេ ទាក់ទងទៅគេមុនគេ រកគេមុនគេ ព្រោះតែរាប់អាន ព្រោះតែស្រលាញ់ ព្រោះតែបារម្ភខ្វល់ពីគេ ។  

ចុងក្រោយក៏លែងទាក់ទងទៅគេទៀត ដោយសារតែមានអារម្មណ៍ថា ខ្លួនឯងគឺគ្មានតម្លៃ មានយើងក៏មិនលើស គ្មានយើងក៏មិនខ្វះ សម្រាប់គេ ។ 

ពិភពដែលយើងចូលទៅមិនរួច កុំប្រឹងប្រជ្រៀតចូល កុំធ្វើឱ្យគេពិបាក កុំធ្វើឱ្យខ្លួនឯងថោកទាប ។ 

មានពេលខ្លះ មិនប្រយ័ត្នក៏បានដឹងរឿងខ្លះដែលមិនគួរដឹង ដឹងថាទង្វើដែលយើងធ្វើរាល់ថ្ងៃ
គ្មានន័យសម្រាប់គេទាល់តែសោះ តើវាគួរឱ្យចង់សើចប៉ុណ្ណាទៅ ? អ្នកណាដែលមិនចេះលាក់ពុតនោះ ? អ្នកណាដែលមិនចេះផ្លាស់ប្តូរ ? គ្មានអ្នកណាដែលជារបស់ផ្តាច់មុខរបស់អ្នកណាម្នាក់ទេ ។ បើអ៊ីចឹងទៅហើយចាំបាច់អី យកមនុស្សខ្លះដាក់នៅក្នុងចិត្ត និង យករឿងខ្លះធ្វើជារឿងសំខាន់ធ្វើអី ?

ការពិតទៅមនុស្សដែលចេះតែសើច មិនដែលឃើញពិបាកចិត្ត ទើបជាមនុស្សដែលគួរឱ្យអាណិតបំផុត ហើយជាមនុស្សដែលទន់ខ្សោយបំផុត ព្រោះគេមិនហ៊ានបញ្ចេញនូវភាពទន់ជ្រាយ អារម្មណ៍ឈឺចាប់ ភាពស្មុកស្មាញរបស់គេចេញមកក្រៅ បានត្រឹមតែឈឺចាប់ម្នាក់ឯង កើតទុក្ខម្នាក់ឯង ។

មនុស្សដែលខ្វល់ខ្វាយពីខ្ញុំ ខ្ញុំនឹងខ្វល់ខ្វាយពីគេវិញទ្វេដង តែអ្នកដែលមិនខ្វល់ខ្វាយពីខ្ញុំ តើរឿងអីដែលខ្ញុំត្រូវខំត្រដរបន្តខ្វល់ខ្វាយពីគេនោះ ? កុំដើម្បីនរណាម្នាក់ទៅកែប្រែខ្លួនឯង ប្រសិនបើគេមិនអាចទទួលយកចំនុចអាក្រក់របស់អ្នកផង គេម្តេចនឹងសក្តិសម​ទទួលយកចំនុចល្អរបស់អ្នកទៅ ? ចង់កែប្រែបាន ប៉ុន្តែតើគេម្នាក់នោះ អាចកែប្រែហើយហ៊ានលះបង់អ្វីខ្លះចំពោះអ្នក ?

នៅលើលោកនេះមានរឿងជាច្រើនដែលអាចឆិនឆៃបាន ។ ចុងក្រោយពេលដែលខ្ញុំបានសម្រេចចិត្ត ដើរចេញពីអ្នក ក៏ព្រោះតែអ្នកមិនឱ្យតម្លៃខ្ញុំ អ្នកមិនស្តាយពេលវេលា មិនចេះក្រសោប អ្នកតែងតែមើលរំលងការស្រលាញ់ ការរាប់អានដ៏ស្មោះត្រង់ ដែលខ្ញុំធ្លាប់មានឱ្យអ្នក ។

ទឹកភ្នែកនិងការស្តាយក្រោយរបស់អ្នកនៅថ្ងៃនេះ គឺបណ្តាលមកពីភាពអំនួតរបស់អ្នកនៅពេលនោះ ពេលដែលអ្នកធ្វើឱ្យខ្ញុំឈឺ អ្នកបែរជាសប្បាយរីករាយជាមួយអ្នកផ្សេង ។ ចុងក្រោយ អ្នកពោលពាក្យថាស្តាយក្រោយក៏ហួសពេលដែរ ។

ហេតុផលនៃការចាកចេញរបស់ខ្ញុំ ក៏ព្រោះតែភាពព្រងើយកន្តើយរបស់អ្នក ព្រោះតែភាពអំនួតរបស់អ្នក ព្រោះតែអ្នកមិនដែលនឹកនា មិនដែលឱ្យតម្លៃខ្ញុំ ដូច្នេះ ខ្ញុំក៏គ្មានកម្លាំងនឹងនៅបន្ត ឱ្យអ្នកទើសមុខ ទើសមាត់ទៀតនោះទេ ... ៕

សុំទោសដល់ម្ចាស់អត្ថបទ ដែលខ្ញុំបានយកមកផុស មិនបានសុំការអនុញ្ញាត មិនបានដាក់ឈ្មោះ ព្រោះខ្ញុំពុំបានដឹងថា នរណាឃាម្ចាស់អត្ថបទក៏មានខ្លឹមសារមួយនេះ ព្រោះតែត្រូវរឿងត្រូវអារម្មណ៍របស់ខ្ញុំ ទើបខ្ញុំតែងតែរក្សា ហើយក៏ផុសរហូតមក

Read More

មេរៀន បទពិសោធន៍ជីវិត

ខ្ញុំយល់ច្បាស់នៅរឿងរ៉ាវមួយចំនួន ដែលបានកើតមាននៅក្នុងជីវិតរបស់ខ្ញុំ បានបង្រៀនឱ្យខ្ញុំ ចេះទ្រាំ ចេះអត់ធ្មត់ រហូតដល់ខ្ញុំ អាចដឹងនិងយល់ ចេះឈរបានយ៉ាងរឹងមាំ ។ ចំណែកមនុស្សដែលនៅជុំវិញខ្ញុំក៏ដូចគ្នា គ្រប់គ្នាបាន បង្រៀនឱ្យខ្ញុំដឹងនិងយល់បានច្រើននពីភាពល្ងង់ខ្លៅរបស់ខ្ញុំ

- អ្នកដែលនិយាយដើមខ្ញុំផ្តល់នូវភាពល្បីល្បាញដល់ខ្ញុំ ធ្វើឱ្យអ្នកដែលមិនស្គាល់ខ្ញុំចាប់ផ្ដើមចង់ស្គាល់ ចាប់ផ្ដើមសម្គាល់លើរូបខ្ញុំ

- អ្នកដែលមើលងាយខ្ញុំបានផ្តល់នូវកម្លាំងចិត្តដល់ខ្ញុំ បានធ្វើឱ្យខ្ញុំចេះឈឺចាប់ ហើយក៏ចាប់ផ្ដើមចេះតស៊ូ ចេះខំប្រឹងប្រែងជំនះ រាល់ពាក្យប្រមាថមាក់ងាយទាំងអស់

- អ្នកដែលកុហកខ្ញុំ បានផ្តល់នូវមេរៀនដល់ខ្ញុំ ធ្វើឱ្យខ្ញុំយល់ពីតម្លៃនៃភាពជឿជាក់ លើការរាប់អាន យល់ពីភាពស្មោះត្រង់ ក្នុងចំណោមមនុស្សដែលយើងស្គាល់

- អ្នកដែលបោកប្រាស់ខ្ញុំ បានផ្តល់នូវបទពិសោធន៍ដល់ខ្ញុំ ធ្វើឱ្យខ្ញុំចេះប្រុងប្រយ័ត្ន ចេះត្រៀមត្រាប់ មើលលើបុគ្គល កាលៈទេសៈពេលវេលា គេធ្វើឱ្យខ្ញុំ ចេះម៉ត់ចត់ជាងមុន

- អ្នកដែលស្រលាញ់ចូលចិត្តខ្ញុំ គឺតែងតែចង់អោយខ្ញុំល្អ ឲ្យតំលៃខ្ញុំ  កែលំអរបើខ្ញុំ ខុសហើយមិនចាកចេញពីខ្ញុំឡើយ គេធ្វើឱ្យខ្ញុំ យល់ពីអារម្មណ៍ដែលកក់ក្ដៅ ឱ្យខ្ញុំរស់នៅត្រូវមានសង្ឃឹម គេផ្ដល់ស្នាមញញឹម និង កម្លាំងចិត្តដល់ខ្ញុំ

- អ្នកដែលច្រណែននឹងខ្ញុំ គឺតែងទើសទាល់ ចាំចាប់កំហុស ចង់អោយខ្ញុំអាក្រក់ ចាក់រុក ឆ្កឹះឆ្កៀល លួចធ្វើបាប ច្រណែន មើលងាយ មិនជួយកែប្រាប់បើខ្ញុំខុស ហើយស្អប់ខ្ញុំ ព្រោះតែចង់ឱ្យខ្ញុំ ពិបាក បរាជ័យ គ្មានសល់អ្វីនៅក្នុងជីវិត គិតតែអ្វីដែលអវិជ្ជមានលើខ្ញុំ នឹងចាកចេញពីខ្ញុំដោយឈប់រាប់អាន គេចិត្តមិនបានឡើយ ហើយគេធ្វើឱ្យខ្ញុំយល់ច្បាស់ថា ការមាក់ងាយមនុស្ស គឺឆ្លុះបញ្ចាំងពីភាពមោហ៍បាំងនៃអវិជ្ជា

ពីមុនខ្ញុំជាមនុស្សទន់ជ្រាយ មិនរឹងប៉ឹងដោយសារតែខ្ញុំ
មិនចេះខិតខំ មិនចង់បាន មិនចង់ដឹង  មិនមានគោលដៅច្បាស់លាស់ និងនិយាយស្តីចូលចិត្តអោយគេជាន់ ដោយគិតថាធ្វើមនុស្សស្លូតប្រសើរជាង តែមានអីអ្នកខ្លះធ្វើបាបមើលងាយ ថែមទាំងប្រមាថថាឲ្យខ្ញុំ បំបាក់មុខខ្ញុំ ប្រឹងជាន់ពន្លិច ចង់ឱ្យខ្ញុំវិនាស  តែរឿងរ៉ាវទាំងនេះ បានធ្វើអោយខ្ញុំចេះដឹងចូលក្នុងសង្គមយ៉ាងល្អ ខ្ញុំមិនដូចពីមុនដែលទន់ជ្រាយឲ្យអ្នកជាន់ទៀតឡើយ កុំមើលមនុស្សត្រឹមតែសម្បកក្រៅ ព្រោះវាសនាមនុស្សរស់នៅ មើលមិនឃើញទេ កុំចង់បំបាក់គេ តែភ្លេចអភិវឌ្ឈន៍ខ្លួនឯង ។

តែយ៉ាងណា ក៏ខ្ញុំចង់ប្រាប់ថា ខ្ញុំអរគុណ ដែលធ្វើឱ្យមនុស្សទន់ជ្រាយ ល្ងង់ខ្លៅម្នាក់នេះ យល់ច្បាស់ពីរសជាតិនៃជីវិត ការរាប់អានមិត្ត និងការប្រើប្រាស់ពេលវេលាឱ្យបានសមគួរ

Read More

តម្លៃនៃបុរស

ក្នុងនាមជាមនុស្សប្រុស មិនគួរណា ហ៊ានប្រើហិង្សា ឬការឈ្លោះប្រកែក តិះដៀល មាក់ងាយ ស្ដីប្រមាថ ជេរប្រទេច ឬប្រើពាក្យសម្ដីអសុរោះ ជាមួយនឹងមនុស្សស្រីឡើយ ។

មិនថាអ្នកខឹងសម្បារយ៉ាងណាក៏ដោយ មិនថាអ្នកត្រូវឬខុស កុំឱ្យសោះ កុំស្ដីនូវពាក្យមិនល្អ បង្ករជម្លោះឈ្លោះជេរបញ្ចោរ ដាក់ស្ត្រី ជាពិសេសមនុស្សស្រីដែលខ្លួនស្រលាញ់ ធ្លាប់ថ្នាក់ថ្នមផ្ទាល់នឹងដៃ ។

ប្រុសឈ្លោះនឹងស្រី ជេរមនុស្សស្រី បើមិនខ្មាសអ្នកដទៃ គួរណាស់តែចេះខ្មាសខ្លួនឯង ។

មនុស្សប្រុស បើអ្នកហ៊ានតែប្រើនូវសម្ដីអសីលធម៌ អសុរោះ ឈ្លោះជេរប្រមាថដាក់មនុស្សស្រី នោះតម្លៃនៃភាពជាកូនប្រុសរបស់អ្នក ក៏មិនសល់ដែរ ។ សម្ដីដែលស្ដីចេញទៅ គឺជាជម្រៅនៃតម្លៃរបស់អ្នក ។

សម្ដីដែលអាក្រក់ មិនត្រូវឱ្យដក់នៅក្នុងចិត្ត ឬអណ្ដាតដ៏មុតស្រួចរបស់អ្នកឡើយ ហើយក៏មិនគួរខ្ជាក់វាចេញ ទៅកាន់មនុស្សស្រីដែលនៅជុំវិញអ្នកដូចគ្នា ជាពិសេស មនុស្សស្រីដែលអ្នកស្រលាញ់ ។

Read More

មនុស្សល្ងង់ម្នាក់នេះ

ខ្ញុំគឺជាមនុស្សម្នាក់ដែលល្ងង់ ព្រោះតែភាពរីករាយ ស្រណុកសុខស្រួល ត្រឹមមួយពេលខ្លីកាលពីមុន ក៏ចង់វិលត្រឡប់ទៅរកកុមារភាពវិញ ជាការពិតជាតិជាក្មេង គឺពិតជាលេងច្រើន ស្គាល់តែពាក្យថា សប្បាយ រីករាយ គ្មានទុក្ខកង្វល់ មិនយល់ពីអ្វីដែលហៅថាទុក្ខលំបាកឡើយ ។

ហើយខ្ញុំក៏កាន់តែល្ងង់បំផុត នៅពេលដែលជួបទុក្ខលំបាកបន្តិចបន្តួច ក៏ព្យាយាមគេចវេស ប្រឹងដើរយ៉ាងណាឱ្យបានផុតពីចំនុចនេះ មិនគិត មិនដោះស្រាយ ធ្វើយ៉ាងណាគឺប្រឹងជម្លៀសខ្លួនឱ្យឆ្ងាយពីពាក្យថា បញ្ហាស្មុកស្មាញទាំងអស់នោះ ទាំងដែលការពិតខ្លួនកំពុងតែរស់នៅជាមួយនឹងបញ្ហា ក៏គួរណាតែព្យាយាមរៀនសូត្រពីបញ្ហា រឿងរ៉ាវអស់ទាំងនោះឱ្យបានល្អិតល្អន់ ខំយ៉ាងណាទើបអាចឱ្យខ្លួនបានស្គាល់កាន់តែច្បាស់ពីរសជាតិនៃជីវិតដែលតស៊ូជំនះ រាល់គ្រប់ឧបសគ្គ ។ 

តាមពិតទៅ អតីតកាល គ្រាន់តែជារឿងដែលកន្លងហួសទៅ ហើយគ្រាន់តែបន្សល់នូវការចងចាំមួយដែលគ្មានថ្ងៃនឹងបំភ្លេចបានតែប៉ុណ្ណោះ តែប្រសិនបើយើងចង់វិលត្រឡប់ ឬចង់ជួបវាម្តងទៀតគឺមិនមែនជារឿងងាយទេ ហើយក៏មិនអាចទៅរួចផងដែរ ។ 

ចំណែកឯរឿងអនាគត ក៏មិនចាំបាច់ចង់ជួបខ្លាំងពេកនោះទេ ព្រោះថាមិនយូរក៏គង់តែបានជួបមិនខានឡើយ ព្រោះថាពេលវេលាមិនមែននៅត្រឹមហ្នឹង ដូច្នេះ ក៏មិនបាច់បង្ខំឱ្យឆាប់ដល់ពេកដែរ ។ 

ថាទៅ ខ្ញុំក៏នៅតែល្ងង់ជាមួយនឹងបច្ចុប្បន្ននេះដូចគ្នា ព្រោះខ្ញុំហាក់ដូចជាមនុស្សម្នាក់ដែលធ្វើអ្វីៗដើម្បីកំដរពេលវេលាអ៊ីចឹង និយាយទៅ វាក៏មិនខុសអី ពីមួយថ្ងៃទៅមួយថ្ងៃ គឺមានន័យថា ធ្វើថ្ងៃនេះ ក៏ដើម្បីតែនឹងដើរឱ្យដល់ថ្ងៃស្អែក ។ ព្រោះថា ខ្ញុំចង់បានពេលវេលានាពេលអនាគត ទើបខំក្នុងថ្ងៃនេះ ។ មិនថាថ្ងៃនេះ ខ្ញុំចំណាយពេលទៅលើអ្វីខ្លះក៏ដោយ ក៏វាល្អជាង ការដែលដេកចាំថ្ងៃស្អែកមកដល់ដែរ ។ 

យ៉ាងហោចណាស់ ក៏បានស្គាល់ថា នេះគឺជា ថ្ងៃនេះ ថ្ងៃនេះមានអ្វីខ្លះ ... ថ្ងៃនេះចេះអីខ្លះ ថ្ងៃនេះស្គាល់អីខ្លះ ... ខ្ញុំអាចនឹងរីករាយ ជាមួយនឹងជីវិត ដែលល្ងង់ ប្រចាំថ្ងៃ ខ្ញុំបានយល់នូវអត្ថន័យជីវិតបានខ្លះៗ ហើយមានរឿងជាច្រើន ដែលខ្ញុំកាន់តែល្ងង់ ល្ងង់សូម្បីតែអ្នកដទៃនិយាយអ្វីខ្លះពីខ្លួន ក៏មិនខ្ចីខ្វល់ មិនខ្ចីរវល់ ដល់ពាក្យនិន្ទារបស់គេ តែក៏រង់ចាំស្តាប់និងគិតដល់ពាក្យរិះគន់ ដើម្បីជាការដាស់សតិ និងកែតម្រូវរាល់កំហុសឆ្គងរបស់ខ្លួនឯង ។ ពេលខ្លះខ្ញុំអាត្មានិយមណាស់ មិនខ្វល់នឹងអ្នកណាទាំងអស់ ព្រោះខ្ញុំកំពុងតែគិតដល់អនាគតរបស់ខ្លួនឯង ខ្ញុំកំពុងតែចាត់ចែងរាល់បញ្ហារបស់ខ្លួន ខ្ញុំអាចជាមនុស្សម្នាក់ដែលរីករាយ ហើយក៏ជាមនុស្សម្នាក់ដែលស្ងប់ស្ងាត់ខ្លាំងបំផុត ។ តែអ្វីដែលខ្ញុំមានគឺ ភាពជាខ្លួនខ្ញុំពិតប្រាកដ ខ្ញុំជាខ្ញុំ ... តែខ្ញុំក៏នៅតែជាមនុស្សល្ងង់ដដែល គ្រាន់តែពេលនេះខ្ញុំអាចពន្យល់ខ្លួនឯងបាន ហើយចែកដាច់ស្រឡះគ្នា រវាង អតីត បច្ចុប្បន្ន និង អនាគត ខ្ញុំអាចបញ្ឈប់ខ្លួនឯងពីការងប់ងល់នឹងអតីត អតីតគឺជាមេរៀន តែមិនអាចឲ្យយើងបានវិលត្រឡប់ទៅវិញម្តងទៀតទេ ដូច្នេះ ខ្ញុំក៏ឈប់គិតចង់វិលត្រឡប់ទៅរកអតីតកាលនោះដែរ មានតែព្យាយាមក្នុងពេលបច្ចុប្បន្ននេះដើម្បី អនាគតមួយដ៏ប្រសើរ ...

Read More

កំហឹង

កំហឹង : ដឹងទាំងដឹង ថារាល់ពេលដែលខឹង នឹងត្រូវបាត់បង់អ្វីខ្លះ ។ កំហឹងមួយឆាវ មនុស្សយើងភាគច្រើន គឺទប់មិនជាប់ឡើយ ចិត្តមនុស្សលឿនណាស់ ងាយនឹងប៉ះទង្គិច ។ អារម្មណ៍ដែលខឹង នឹងត្រូវប្រឈមមុខនឹងការបាត់បង់សតិ គ្មានការគិតពិចារណា ជួបកាលខឹងខ្លាំងក៏អាចបណ្តាលឱ្យបាត់បង់ជីវិតក៏មាន ។ ខ្ញុំជឿ ថាគ្រប់គ្នាប្រាកដជាខឹង អ្នកណាៗក៏ចេះខឹង មិនថាសូម្បីតែខ្ញុំ ។ គ្រាន់តែអ្នកខ្លះ គាត់ខឹងក៏ពិតមែន តែគាត់ក៏មានភាពត្រជាក់នៅក្នុងនោះ ភាពត្រជាក់នឹងអាចបង្ក្រាប់អារម្មណ៍របស់គាត់បានខ្លះ គាត់អាចគ្រប់គ្រងលើស្ថានការណ៍បាន ដោយការជម្លៀសខ្លួនឱ្យនៅឆ្ងាយពី រឿង ឬមនុស្សដែលធ្វើឱ្យប៉ះដល់អារម្មណ៍គាត់ គាត់អាចបញ្ជាខ្លួនឯងឱ្យស្ងប់បាន ។ ដូច្នេះ មនុស្សយើង បើចេះខឹង ក៏ត្រូវតែដឹងពីវិធីរំងាប់កំហឹង ហើយក៏ត្រូវចងចាំជានិច្ចថា កំហឹង នឹងធ្វើឱ្យយើងប្រឈមមុខតែនឹងភាពបាត់បង់តែប៉ុណ្ណោះ បើអ្នកមិនចង់បាត់បង់ អ្នកក៏ត្រូវតែ ចេះគ្រប់គ្រងអារម្មណ៍របស់ខ្លួនឯងឱ្យបានខ្ពស់ ។ វិធីបឋម ដែលអាចគ្រប់គ្រងអារម្មណ៍ខ្លួនឯងបាននោះគឺ ត្រូវនៅឱ្យស្ងៀម ពេលដែលអ្នកខឹង កាន់តែខឹង គឺកាន់តែស្ងាត់ សុខចិត្តដកខ្លួនមកសំងំម្នាក់ឯង ដើម្បីពិចារណាទៅលើបញ្ហា រឿងរ៉ាវណាដែលបណ្តាលឱ្យយើងខឹង ។ មិនថារឿងនោះ ជាមួយអ្នកណាក៏ដោយ ទោះយើងខុសឬត្រូវ ក៏ត្រូវតែគិតនិងពិចារណាឱ្យបានល្អិតល្អន់ កុំកាន់ជើងខ្លួនឯង ថាយើងត្រូវ ព្រោះកាលណាដែលយើងគិតលម្អៀងមកលើខ្លួនឯង នោះយើងក៏នៅតែជាមនុស្សម្នាក់ដែលមិនជឿជាក់លើការគ្រប់គ្រងអារម្មណ៍ ពេលក្រោយៗទៀតក៏យើងនៅតែជាមនុស្សដែលបណ្តោយអារម្មណ៍នោះត្រួតត្រាលើយើងដដែល ។ មនុស្សដែលអាច គ្រប់គ្រងអារម្មណ៍ខ្លួនឯងបាន អ្នកនោះហើយនឹងមានក្តីសុខច្រើន ... ខឹងខុស ខឹងខូច ខឹងខាត ...៕

Read More

ដួងចិត្តស្ត្រី

មនុស្សស្រីគ្រប់រូប តែងប្រាថ្នាជួប បុរសម្នាក់ដែលល្អ ហើយបន្តដំណើរជីវិតរួមគ្នា រហូតដល់ជរាវ័យរៀងៗខ្លួន ។

មនុស្សស្រី មិនប្រាថ្នាទេ ជីវិតគូ ដែលបែកបាក់ មិនថាព្រាត់ស្លាប់ ឬព្រាត់រស់ តែសម្រាប់នារីខ្លះ គឺជាអនិច្ចាកម្ម ដែលមិនអាចប្រកែកបានឡើយ ព្រាត់រស់ អាចព្រោះអស់ចិត្តស្រលាញ់ តែព្រាត់ស្លាប់វិញ ដឹងទេ ថាវាឈឺចាប់ប៉ុណ្ណា ។

ក្នុងនាមជាស្ត្រី ក្នុងនាមជាមាតា រាល់ពេលដែលសម្រាលបុត្រ នាងត្រូវការបំផុត គឺស្វាមី នៅជិត នៅក្បែរ មើលថែ ឱ្យកម្លាំងចិត្ត ប៉ុន្តែ សម្រាប់នារីខ្លះ បែរជាព្រហ្មលិខិត កម្រិតឱ្យនាង គេសម្រាលបុត្រ តែម្នាក់ឯង កណ្ដោចកណ្ដែង មានតែពេទ្យ ដែលជាអ្នកផ្សេង ។

ដឹងទេ គ្រប់ពេល ទោះបីស្ត្រីម្នាក់នោះ រឹងមាំខ្លាំងប៉ុណ្ណា ក៏នាងនៅតែត្រូវការ ការលើកទឹកចិត្ត ការផ្ដល់កម្លាំងចិត្ត ការយកចិត្តទុកដាក់មើលថែ ពីមនុស្សដែលនាងស្រលាញ់ ជាពិសេស គឺស្វាមី នាងមិនចង់ឱ្យមានថ្ងៃ បែកបាក់គ្នាឡើយ ហើយក៏រឹតតែមិនចង់ឱ្យ ជីវិតគ្រួសារ ជួបការព្រាត់ប្រាស់ ប្ដីព្រាត់ប្រពន្ធ ម្ដាយឪពុកព្រាត់កូន ។

ឆាកជីវិត ដែលត្រូវមួយជួបការបែកបាក់ និរាសព្រាត់ប្រាស់គ្នា ដឹងទេ ថាវាវេទនាចិត្តខ្លាំងកម្រិតណា ជីវិតគ្រួសារ ដែលធ្លាប់តែទៅណាមកណាជាមួយគ្នា គ្រប់ពេលវេលា មានតែក្ដីសុខ សុភមង្គល ស្នាមញញឹម ក្ដីសង្ឃឹមរួមគ្នា តែឥឡូវបែរជា គ្រាំគ្រាចិត្ត ដ្បិតគ្រួសារមួយនេះ ត្រូវរបេះបង្គោល សសរដ៏រឹងមាំបាត់ទៅហើយ តើឱ្យសង្ឃឹមអ្វី មេឃដីអយុត្តិធម៌ មេឃដីប្រឡាក់ពណ៌ដ៏គ្រោតគ្រាតខ្មៅងងឹត បង្ខិតបង្ខំជីវិតមនុស្សម្នាក់ ឱ្យលាចាកលោកនេះទៅ បន្សលមទុកនៅ ដំបៅក្នុងក្រអៅបេះដូងរបស់ស្ត្រីម្នាក់ និងកូនៗ ដែលហាក់ដូចកំពុងតែនៅលើក្បូន កណ្ដាលសមុទ្រ ផុតកោះផុតត្រើយ #រងាណាស់

គ្រាន់តែសង្ឃឹមថា គ្រួសារមួយ ដែលត្រូវចាប់ផ្ដើមជាថ្មី ទោះបីគ្មានស្វាមី គ្មានឪពុក ទំនុកបម្រុង តែសូមឱ្យក្នុងគ្រួសារ ទទួលបានភាពកក់ក្ដៅ ពីកម្ដៅដើមទ្រូងនារីម្នាក់ដែលឈ្មោះថាម្ដាយ សូមឱ្យគ្រប់គ្នា មានជីវិតដ៏ល្អប្រពៃ ជីវិតមានន័យ មានតម្លៃ ទទួលជោគជ័យ មានក្ដីសុខ សុភមង្គលតរៀងទៅ

ដំណើលើផ្លូវ ឆ្ពោះទៅរកគោលដៅដែលលោកឪពុក ធ្លាប់បានប៉ងប្រាថ្នា

® បញ្ជាក់រូបថត

នៅ​ថ្ងៃ​ទី​ ០២​ ខែ​ តុលា​ ឆ្នាំ​ ២០១៦​ ​កូន​ប្រុស​ទី​ ៥​របស់​លោក​បណ្ឌិត​ កែម​ ឡី​ អធិរាជ​សំដី​មាស​ បាន​កើតមកហើយ​ វេលា​ម៉ោង​ ៥​និង​ មួយ​ នាទី​ ទំងន់​ ២​ ,៧​ kg មានឈ្មោះ​ថា​ កែម ឡី​ វីរៈ​ សូម​បងប្អូន​ជនរួមឈាមខ្មែរ​នៅ​គ្រប់​ទិសទី​ជុំ​វិញ​ពិភពលោក​ចូល​រួម​អបអរ​សាទរ​ផង​ ។

Read More