តើមានអ្នកណាខ្លះ ដែលស្គាល់អារម្មណ៍មួយនេះច្បាស់ដូចខ្ញុំ ខ្ញុំជឿថាប្រាកដជាមាន ហើយក៏ច្រើនណាស់ដែរ មិនមែនមានតែខ្ញុំម្នាក់នោះទេ ហើយគ្រប់គ្នា ក៏គួរតែជឿដែរទៅថា មិនមែនមានតែអ្នក ដែលធ្លាប់ធ្លាក់ចូលក្នុងអារម្មណ៍ទាំងនេះ ឬក៏កំពុងតែជួបប្រទះបែបនេះ ។
ខូចចិត្ត ខកបំណង បរាជ័យ ទាំងបីនេះហើយ ដែលធ្វើឱ្យខ្ញុំ បាត់បង់ក្ដីសុខ មួយចំណែកធំនៅក្នុងជីវិត ។
ខ្ញុំធ្លាប់ " ខូចចិត្ត "បើគិតទៅរហូតមកដល់ឥឡូវ ក៏នៅតែថ្លោះធ្លោយ បណ្ដោយឱ្យខ្លួនឯង ខូចចិត្ត ។ ខ្ញុំខូចចិត្តរឿងអ្វី រឿងស្នេហា រឿងគ្រួសារ រឿងការសិក្សា រឿងការងារ ឬជារឿងអ្វីឱ្យពិតប្រាកដ ? ពាក្យថា ខូចចិត្ត ទោះជាខូចចិត្តរឿងអ្វីក៏ដោយ តែងតែធ្វើឱ្យអារម្មណ៍នេះ ហេលហាល ស្រាលខ្លួនទទេរ ហាក់ដូចជីវិតនេះគ្មានអ្វីទាល់តែសោះ ស្ទើរតែបោះបង់ខ្លួនចោលម្ដងៗទៅហើយ ។ តែចុងក្រោយ មិនដឹងថា អារម្មណ៍ខូចចិត្តនោះ វាទៅណាបាត់ បន្ទាប់ពីពេលវេលា ជាអ្នកព្យាបាល ពេលវេលា បាននាំយើងមកដល់ចំណុចមួយដែលធ្វើឱ្យចិត្តនេះ បានជាសះស្បើយ ហើយដឹងថា ការខូចចិត្ត បើយើងចេះគិត វានឹងធ្វើឱ្យយើងខិតខំរស់បន្ត ហើយត្រូវរស់ឱ្យបានល្អប្រសើរ តែបើយើងខូចចិត្ត ហើយមិនគិតពីខ្លួនឯង ភាពចម្បែងខ្វល់ខ្វាយ មិនអាចស្រាយវិបត្តិដួងចិត្តនេះបានឡើយ ។
ខ្ញុំធ្លាប់ " ខកបំណង " រឿងខកបំណងនេះ មិនដឹងទេថា ប៉ុន្មានលើកប៉ុន្មានសារទៅហើយ ទោះឥឡូវនេះក៏ដោយ ក៏នៅតែមានរឿងខ្លះ ត្រូវប្រឈមនឹងការខកបំណងយ៉ាងខ្លាំង ។ ខកបំណង ព្រោះអ្វីដែលខំប៉ង ប្រែជាខកខាន មិនបានដូចចិត្ត ដែលគិតទុក ខកបំណង ព្រោះអ្វីដែលប៉ង បានត្រឹមតែជាការគិត ស្រមើស្រមៃ គ្មានថ្ងៃនឹងកើតឡើងបាន ។ គ្រប់យ៉ាងដែលយើងបានប៉ង គ្រប់យ៉ាងដែលយើងចង់បាន មិនមែនសុទ្ធតែអាចបានដូចចិត្តទាំងអស់នោះទេ ពេលខ្លះ សម្រាប់រឿងខ្លះ បើយើងខំស្រវេស្រវា ឱបក្រសោបណាស់ វាក៏កាន់តែរបូតចេញពីយើងទៅ មិននៅជាមួយយើងទេ ព្រោះវាមិនមែនជារបស់យើង វាមិនត្រូវនឹងយើង ។ ដូច្នេះហើយ សូមកុំបណ្ដោយឱ្យការខកបំណង ក្លាយជាចំណងចងខ្លួនអ្នក ឱ្យធ្លាក់ចូលទៅក្នុងរណ្ដៅនៃវិប្បដិសារី គួរតែឈប់គិតស្រមៃ គួរតែចាប់ផ្ដើមសម្លឹងមើលអ្វីដែលថ្មីវិញ កុំប្រឹងតាមដេញចាប់ នូវអ្វីដែលមិនមែនជារបស់យើង នេះជាការកាត់បន្ថយ នូវសេចក្ដីខកខាន នៃការប៉ុនប៉ង ឬបំណងប្រាថ្នា ។
ខ្ញុំធ្លាប់ " បរាជ័យ " ប្រាកដជាមានអ្នកឆ្ងល់ហើយថា ខ្ញុំធ្លាប់ធ្វើអ្វីខ្លះ ទើបមានជា បរាជ័យ ។ ការខូចចិត្ត ខកបំណង ក៏ជាផ្នែកមួយនៃភាពបរាជ័យដែរ មានរឿងខ្លះ ខ្ញុំបានធ្វើវា តែខ្ញុំមិនអាចបញ្ចប់វាបាន គឺវាទើបតែបានពាក់កណ្ដាល តែខ្ញុំបែរជាបោះបង់ចោល ខ្ញុំលែងបន្តទៀត ព្រោះតែខ្ញុំគ្មានតម្រិះនឹងបន្ត ព្រោះខ្ញុំអស់កម្លាំងចិត្ត នឹងគិតវាទៀត ខ្ញុំបញ្ឈប់គ្រប់យ៉ាង ដែលខំសាងពីដើមមកយ៉ាងគាប់ តែទីបំផុត ខ្ញុំក៏បញ្ឈប់វាត្រឹមពាក់កណ្ដាលទី នេះហើយជាភាពបរាជ័យនៃជីវិត ។ មានរឿងខ្លះទៀត ខ្ញុំបានត្រឹមគិត បានត្រឹមរៀបគម្រោង តែខ្ញុំបែរជាមិនព្រមឈោងចាប់វា ព្រោះតែភាពកំសាក ញ៉ាក មិនហ៊ាន គិតថាខ្លួនឯងគ្មានសមត្ថភាព គ្មានសំណាងនឹងបានវា តែស្របពេលនឹងអ្នកដទៃ មើលមកថា វាជាអ្វី ដែលខ្ញុំអាចធ្វើបាន ។ អ្នកដទៃគិត មិនដូចខ្ញុំគិត ខ្ញុំគិតមើលស្រាលខ្លួនឯង ខ្ញុំមាក់ងាយខ្លួនឯងរហូតមក ទើបខ្ញុំមិនអាចសម្រេចកិច្ចការណាមួយសោះក្នុងជីវិត ។ ប៉ុន្តែ ចាប់តាំងពីខ្ញុំ បានធ្វើរឿងម្យ៉ាង ទទួលបានជោគជ័យ ក៏ខ្ញុំបានយល់ពីអត្ថន័យនៃការខិតខំវ្រឹងប្រែង ការព្យាយាម និងការបន្តយ៉ាងសន្សឹមៗ មិនរាថយ ចុងក្រោយ មានរឿងច្រើន ដែលខ្ញុំតែងគិតថា ខ្ញុំមិនអាច ព្រោះតែខ្លាច តែខ្ញុំនៅតែអាចធ្វើឱ្យវាចេញជារូបរាងមកបានយ៉ាងស្រស់ស្អាត បើទោះជាវាមិនមានក្នុងក្រសែភ្នែកអ្នកដទៃ តែវាមានន័យ មានតម្លៃក្នុងជីវិតខ្ញុំ ព្រោះខ្ញុំបានផ្គុំវាឡើងមកបានដោយភាពជឿជាក់លើខ្លួនឯង ។
ទោះបីក្នុងជីវិត អ្នកត្រូវខូចចិត្តប៉ុន្មានដង ខកបំណងប៉ុន្មានសារ បរាជ័យប៉ុន្មានលើក៏ដោយ តែសូមឱ្យអ្នកចងចាំថា ការមិនអស់សង្ឃឹម មិនបាក់ទឹកចិត្ត វានឹងធ្វើឱ្យយើង អាចសម្រេចនូវភាពពិតប្រាកដនៃខ្លួនឯង ។ បើទោះជាអ្នកផ្សេង គេមិនឱ្យតម្លៃយើង គេមាក់ងាយយើងក៏ដោយ តែបើយើងជឿជាក់លើខ្លួនឯងហើយ ដឹងថាវាល្អហើយ ចូរបន្តទៅមុខកុំចុះចាញ់ ធ្វើឱ្យគ្រប់គ្នាបានដឹងថា យើងអាចធ្វើបាន យើងមិនកំសាក យើងមិនរាថយទេ គេអាចធ្វើបាន យើងក៏អាចធ្វើបានដូចគ្នា ។
កុំអស់សង្ឃឹម កុំបាក់ទឹកចិត្ត ត្រូវខិតខំបន្ត ក្រោយឈរហើយដើរទៅមុខ ព្យាយាម ប្រឹងប្រែង ស្វែងរកគោលដៅឱ្យជីវិត នៅពេលដែលអ្នកស្គាល់ថាខ្លួនឯងជាអ្នកណា អ្នកក៏អាចដឹងបានហើយថា ចំណុចណាដែលអ្នកគួរនៅ ទីណាដែលអ្នកគួរទៅ ... ។
ហើយនៅពេលដែលអ្នក អាចស្វែងរកគ្រប់យ៉ាងដែលអ្នកការ អ្នកអាចឈ្វេងយល់ពីខ្លួនឯងបានហើយនោះ ក្ដីសុខដែលអ្នកធ្លាប់បាត់បង់ នឹងប្រែក្លាយទៅជាជីវិតដែលផូរផង់ ត្រចះត្រង់ មានន័យនុងមានតម្លៃជាក់ជាមិនខាន ។
